I VECCHI
Stanno dda, ‘nta chiazza
discutendu affannati, i mani
movunu comu ddi filosufi
chi spiegunu u sensu di la
vita.
Davanti a casa, china
di ritratti ‘ncuddati,
scupunu muti a puvviri
du tempu, assemi
a pezzi di li sò ricoddi.
Nasciunu ‘nto menzu
‘e jochi di li niputeddi
e dopu morunu
quannu li figghi apprimurati
li salutunu appena.
Vaddatili senza fari rumuru,
senza suspirari, facendo
battiri
cchiù chianu puru lu cori…
ddi vecchi semu nui.